师兄，点解唔打度符过去收咗佢呢？之前听讲佢屋企人讲过，揾咗位学道嘅师兄，就喺打咗几度符过去，学你话想收咗佢，点知越打佢好似越劲，完全唔怕。况且，佛教极少用符，多数用咒。头先我用六字大明试一试佢，好似唔系好怕；于是我改念大白伞盖，即时感觉佢同我抗衡，你都见佢个身摆来摆去啦！唔简单。
2013-6-16 17:03
咁点收科呢呢次？真系大件事！佢公司唔俾佢请咁多假架，又唔知点同老顶解释，唔通话佢撞邪？咁样再请假法，连份工都冻过水呀！肯定无得捞。你唔好急，等间我用首楞严咒试试，问下佢咩原因唔肯走？但有时又怕落法多，佢肉身又顶唔住，已经几日冇食嘢。你带佢去睇医生，盏俾啲精神药佢喫，都系攞嚟搅！
2013-6-16 18:08
头先用首楞严咒，果然有效，感觉佢好怕，但法力唔弱，点都死顶唔肯走。你要明白一样嘢，唔系啲咒冇用，系对方业力隔住，所以无形中坐大咗佢个势；况且我哋凡人修为有限，我哋又唔系佛菩萨，念出嚟，啲咒力必定差天共地。啱啱佢屋企人话想带佢走，可能见我哋搅咗咁耐都咁上下，冇信心，热饭点可热食丫！
2013-6-16 19:07
咁由得佢哋带佢走，都冇办法，要尊重佢屋企人意思。咁边个救佢呀？好难讲，要睇佢自己造化，只有随缘。其实好多呢啲附身个案都未必搅得掂，有好多当咗佢痴线，语无伦次又指手划脚，送去睇精神科，医生梗系当你精神病医，可能喫一世精神药都唔定，好多屋企人系唔信呢啲嘢。入咗癫人院，咁债主咪开心啰！
2013-6-16 19:28
我唔赞成用符打佢，搅恶佢更加仇恨深，条债几时还得完，我听过好多道长用符打，想灭咗佢，但唔系一定得架，因为有时唔知对方几多斤两，万一高过你，帮人帮唔到，搅衰自己就麻烦。就算你法力大，对方搅唔到你，佢搅你啲家人咪重大剂，试过有咁样嘅情况嘞！所以冤家宜解不宜结，尽量想方法解怨先系上策。